Brunova UB er ei ungdomsbedrift frå Stryn vidaregåande skule som har utvikla og produsert brettspelet Jakta på Ceciliekruna. Spelet tek utgangspunkt i ei gammal sagn frå eit av dei lokale fjella i Stryn, og kan minne litt om spelet «den forsvunne diamant». Målet til Brunova har vore å skape eit alternativ til auka skjermbruk, og heller legge til rette for spennande samspel mellom menneske i alle aldrar.

Ungdomsbedrifta har utvikla heile produktet sjølv, heilt frå ide og design, til ferdigstilling. Amanda er grafisk designer og designa både brettet og boksen heilt sjølv. Reglane og samansetning av spelet har dei også gjort heilt sjølve for hand. Sjølve brettet blir trykt lokalt, noko som styrkar både kvalitet og bærekraft.

Produktet rettar seg mot familiar, elevar og lokalsamfunnet i Stryn kommune, og skil seg ut ved å kombinere underhaldning med lokal identitet. Dei har opplevd stor interesse i marknaden, særleg gjennom lokal forankring og sal i førjulstida. Framover ønskjer dei å nå ut til fleire kundar, og selge spela vidare til souvernirbutikkar.